EtnoSMART–2025: enämbi puoldu sadua nuordu tuli Ven'an eri kolkis
Karjalas 25.—29. syvyskuudu pietäh kanzoinväline EtnoSMART-nuorižofourumu. Pido jagavuu kahtekse: 25.—27. syvyskuudu fourumalazih nähte on valmistettu programmu Petroskois, 27.—29. syvyskuudu nuorii vietäh Anuksen piirih turistukohtah, kerrotah fouruman luadijat VKontaktas.
— Myö saimmo enämbän sadua zajavkua. Valličendan jälles fourumah yhtyy enämbi 50 hengie Karjalan eri puolis, Sankt-Peterburgas, Nižnii Novgorodas, Kazanis, Vorounežas, Saranskas, Komin tazavallas da Pihkovan alovehelpäi, sanoi Oma Mediale Periodika-julguamon Ystävystaloin spetsialistu Marija Safarova.
Fouruman piätarkoitus on kanzoinväline yhteisruado, nuorižon projektoin kannattamine da kul’tuuruperindön säilyttämizeh nähte tarkoitettuloin projektoin todevuttamine.
Fourumalazile on valmistettu suuri programmu, kuduas on luvenduo, ruadopajua da seminuarua. Ližäkse fourumah yhtynyöt luajitah omii projektoi, kuduat koskietah kanzallistu poliitiekkua sego kanzoinvälizii suhtehii nuorien keskes.
Ližiä tieduo fourumah nähte löydyy tiä.
Aihies voibi lugie myös suomekse ja ven’akse.
