EtnoPRO: tehokaš aloiteh kyšyy jatkuo
Pertoskoissa piätty enšimmäini nuorisoissunto EtnoPRO-2022. Nelläpäiväni tapahtuma, kumpani yhisti 31 nuorta ihmistä Karjalan eri piiristä piätty. Issunnon aikana yli kymmenie tuntie kešti eri-teemosie luvenoja ta muasteri-oppija.
Kaikki ošallistujat oli juattu kolmeh ryhmäh, missä opaštajien kera oltih pakinoita ta harjotteluja kielen, kuttuurin, turismin, median kyšymykšistä. Nuoret ihmiset šuatih rohkiešti kertuo omista ajatukšista ta projektiloista. Tiälä hyö löyvettih šamanmielisien ihmisien huomijuo ta kannatušta.
̶ Tapahtuma nuorisuo varoin šemmosešša muuvvošša oli pietty enšimmäistä kertua. Šen aikana šaima hyvie šanoja ta toivomukšie, jotta monella olis mukava kurkistua toisih ošaštoloih. Enši vuotena tahomma toistua tapahtuma ta toivomma parentua šitä ta jotta vielä enempi ihmistä tulis meilä, šano Karjalan kanšallisen ta alovehellisen politiikan ministerijön spesialisti Aleksandra Anufrijeva.
Ruavon tulokšet oli esitetty session lopputilaisuošša. Lyhyöššä ajašša onnistu šuatujen tietojen mukah yrittyä omie voimie esimerkiksi videon kuvuamisešša, toimenpivon pitämiseššä tahi projektin kekšimiseššä.
̶ On ylen kallista, jotta tiälä myö šaima tutuštuo mitein meijän kolleegat toisista piirilöistä ruatah ta niise esittyä omua kokemušta. Yhtehisissä keškušteluissa šynty uušie idejoita ta ajatukšie, mitein toteuttua entisie luovie projektija, šano issunnon jäšen Vaeria Sozonova.
Issunnon viimesenä päivänä oli järješšetty matka Kintahan kyläh, missä toteuttuu karjalaiseh kulttuurih pohjautuja matkailuprojekti, kumpasen tekijillä šyntyy aina uušie ajatukšie mitein kehittyä kylyä.
EtnoPRO-issunnon järještäjinä oltih kanšallisen ta alovehellisen ministerijö ta Periodika-kuštantamo.
Uutisie ta valokuvie tapahtumista šuau löytyä #этнoPROэтнo -heštegilla Vkontankte-verkošša.
