EtnoPRO-nuorisosessio starttasi Petroskoissa
Elokuun 7.—10. päivinä Petroskoissa pietäh EtnoPRO-nuorisosessio. Šiih tuli yli 40 nuorta ihmistä Karjalan eri piiristä. Nellän päivän aikana nuoret aktivistit ruvetah ruatamah kolmen ekspertin Svetlan Kol’čurinan, Anna Tomčikin ta Jekaterina Jefremovan johtamissa ryhmissä ta käymäh entokulttuuritoiminnan kehittäjien luvennoissa.
— Session piätarkotukšena on kuččuo aktivista nuorisuo etnokulttuuritoiminnan kehitykšeh ta Karjalan kantakanšojen kulttuurikyšymykšien ratkaisomiseh, opaštua heitä ruatamah tällä alalla. Šemmoni sessio on ainutluatuni meijän tašavallašša, šano Karjalan kanšallisen ta alovehellisen politiikan ministerijön spesialisti Aleksandra Anufrijeva.
Nuoret ihmiset ollah eri piirien etuštajina. Eryähät tultih sessijoh toiseh kertah, eryähät ollah ilosie ošallistumah enšimmäseh kertah.
— Tänä vuotena mie rupesin ruatamah nuorison kera. Miula on mukava tiijuštua, kuin kehittyä etnokulttuurista ruatuo nuorien kera, toivon, jotta tiälä mie šuan šemmosta kokemušta. Mie tulin Kalevalan piiristä ta miun kera on kakši neičyttä, kumpaset tänä vuotena lopetettih koulu, ka piätettih ošallistumah niise, šano Pervije-nuorisoliikkehen spesialisti Tatjana Grigorjeva.
Joka session päivänä on aktiivini ohjelma, kumpasešša luventojen ta opaššukšen lisäkši on kulttuuritapahtumieki – matkuštamini Kinnermän kyläššä ta ošallistumini Karjalaini kruuga -aktijoh. Tänäpiänä ošallistujat tutuššuttih eksperttiloih ta toini toiseh, jotta yštävälliseššä joukošša jatkua ruatuo.
Aihiešta voit lukie niise šuomekši.
