“EtnoPRO” -norišton sessii zavodi ičeze radod
Koumanden kerdan Karjalas tehtas “EtnoPRO” -norišton sessii, mitte om omištadud Karjalan igähižiden rahvahiden etnokul’turižele kehitoitandale.
“EtnoPRO” -norišton sessii mäneb 9.—12. elokud. Sen ühtnikad oma aktivižed 18-35-voččed mehed Karjalan erazvuiččiš agjoišpäi. Sessijan rad om jagetud koumehe sekcijaha: “Koumanz’ sija — Kodin da Radon keskes”, “Muzei om sija kaikuččele”, “Radonmahtod kreativižen ekonomikan sektoran”.
— Minun rad om sidotud kodikelen da kul’turan kaičendaha, sikš minei om melentartušt “Koumanz’ sija — Kodin da Radon keskes” -sekcii. Sil pagiškandem ühthižkundan rados Karjalan igähižiden rahvahiden tradicionaližil eländtahoil, sanui Šoutjärven školan vepsän kelen opendai Anastasia Jevtušenko.
— Iče olen vepsläine. Elän Kvarcitnijas. Joudajal aigal kuvadan tohespäi, tegen erazvuiččid čomitesid. Toivon, miše sessijal san uden mahtišton, starinoiči Petroskoin universitetan üläopenik Denis Laidinen.
Sessijan ühtnikoiden edes om nel’l’ päiväd äipoližen kul’turprogrammanke, vastused melentartuižiden ristituidenke, lekcijad da mastar’klassad.
“EtnoPRO” -norišton sessii tegeb “Periodika”-painišt ühtes Karjalan rahvahaližen da regionaližen politikan ministerstvanke.
Uzištoid neciš temas voib lugeda mugažo karjalaks da venäks.
