EtnoPro: issunnon tuloš on uušie projektija
Yli 40 nuorta ihmistä Karjalan eri piiristä šai uušie tietoja, kuin kehittyä etnokulttuuritoimintua. Issunnon aikana oli šujuvua bisnessie kehittäjien ihmisien esitykšie, jotta nuoret kačottih esimerkkie, kuin kehittyä omua asieta, kumpasen keškukšešša on etnokulttuurini komponentti.
— Viime vuotena myö pitimä nuorisoissunto enšimmäiseh kertah ta šaima toivomukšie, jotta jokahisella ošallistujalla olis mahollisuš kuunnella kaikkie pakinanpitäjie. Tänä vuotena kaikki ošallistujat ruattih yheššä, juohattajat autettih heitä valmistua projektija oikein. Šuaha n’euvuo voipi jokahiselta heistä, šano Karjalan piämiehen granttien fondin johtaja Jekaterina Isakova.
Lopputilaisuošša issunnon jäšenet esitettih issunnon aikana kekšinyijen projektien idejoja, kuin järještyä kouluissa etnoteatterija, kerätä nuorison etnoliittoja, kertuo enemmän karjalaisešta keittijöštä ta toisie. Joka ideja voipi šuaha kehityštä ta apuo toteuttamisešša.
— Mie luulin, jotta ohjelmašša enemmän karjalan kieltä ta karjalaista kulttuurie tulou, ka oli enemmän projektiruatuo. Mie ošallissuin joukošša, kumpani kekši projektija, kuin kehittyä etnokulttuuritoimintua lapšien kešen, šano Vesläžed-folklorijoukon piäštökäš Marija Golovanova.
EtnoPro-issunnon lopušša oli järješšetty vaštautumini Karjalan kanšallisen ta alovehellisen politiikan ministerin kera. Sergei Kiseljov vaštasi nuorien kyšymykših ta myönti ošallistujan toviššukšie. Hiän korošti, jotta aktiivisien nuorien käsissä on etnokulttuurini kehityš ta kaikista eniten šitä tarvitah piirilöissä.
Aihiešta voit lukie niise šuomekši.
