Erillizen voinuoperatsien veteruanoi ruvetah opastamah
Karjalan tazavaldu enzimäzenny yhtyi kogo Ven’an programmah ”Vrem’a Zavtra”, kuduan mugah erillizen voinuoperatsien veteruanoi ruvetah opastamah uuzih transportu- da yhtevysaloih kiini olijoih ammattiloih.
Veteruanoin gospitalis tervehytty parandajile veteruanoile kehoitettih opastustu eri aloil: miehittämättömien ilmukonehien ruado, digitualine kuvavus valvondah da dokumentoičendah nähte, tegointellektan käyttö tiedoloin tutkimizekse. Kai net ollah kingiesti kiini transportualan kehittämizen tärgielöih suundih.
— Minä tahtozin, ku kodih tulduu työ suazimmo meijän huoldu. Myö tahtommo siduo teijän reabilitatsii da eri ammattiloih opastundu. Eläjes se hyvin pädöy, sanoi Karjalan tervehyönministru Mihail Ohlopkov Sampo TV 360 -kanualale.
Projektan piälikkö, Ven’an piälysmiehien El’brus-kluuban Kurskan alovehellizen ozaston edustai Ol’ga Vorošilovan sanoin mugah projektan vuoh tavoitetah tärgielöi tarkoituksii: tervehyön parandustu keskustamata veteruanoile annetah psiholougistu abuu da ruadoneroloi, kudamii tarvitah muan transportualal.
Projektu ”Vrem’a Zavtra” oli ezitetty Sotsiualuprojektoin ohjavopaja -programman hantuzis Senež-ohjavopajan kannatuksel prezidentukentäl ”Ven’a — mahtoloin mua”. Projektua kannatetah Karjalan haldivo, Ven’an Yhteiskunnalline paluattu, mi tovendau sen sotsiuallistu tärgevytty. Tazavallas projektu on haldivon premjer-ministran Andrei Sergejevan silmän al.
Erillizen voinuoperatsien veteruanoi ruvetah opastamah Petroskois 13.—26. ligakuudu, projektah yhtyy 19 hengie, kudamil on tugi- da liikunduelimien satatuksii.
Aihies voit lugie vepsäkse da suomekse.
