Ekotaksi kävyi Jyrgiläh, Vieljärveh, Priäžäh da Matrossah. Se keräi plastiekkua, hylgybumuagua, metallua da st’oklua. Enzimäzeh ekotaksih yhtyi läs puolisadua hengie. Hyö tuodih läs puolitostu tonnua jätehty – rodih täyzi mašin.
— Kogo vuvven olemmo kerännyh erikseh, meidy harjaitettih lapset. Bumuagat poltammo, muut panemmo saruah. Ylen hyvä, ku tuli ekotaksi. Huavaimmo vediä jättehet Petroskoil, nygöi annammo tänne, sanoi vieljärveläine L’ubov Filippova.
— Pidäs kaikil ennepäi kerätä, tuvva, sit mašin ottau, Vieljärvi rodieu puhtas. Tulgua puaksumbah meile ottamah! kučui Nadežda Zaiceva.
Kai kerätyt jättehet suahah uvven käytön.
— Kalipso-laitos lajittelou jättehet. Erikseh st’oklat värin mugah, metallat da plastiekat luavun mugah. Sit net työtäh Ven’an luodehen zavodoile. St’oklas azutah uuttu pulluo, kartonas - uuttu kartonua, metallu on helpoh sulatettavu uvvessah. Plastiekas azutah lämmänpidäjiä da tiepiällystehty da äijy midä muudu, sellittäy Ekotaksin organizuiččii Mihail Gusakov.
Reissu piettih Ekodvor-yhtymys da Kalipso-laitos Wasteless Karelias -projektan avul. Tämä raja-alovehyhteisruadoprojektu on menos Suomen Pohjas-Karjalas da Ven’an Karjalas. Tavoittehennu on opastua rahvastu erikseh keriämäh jättehii da pidämäh luonduo puhtahannu.
Rahvas toizisgi kylis tahtottas, ku heile kävys ekotaksi. Sih pidäy suurembua valdivon abuu. Jättehien hinnat ollah pienehköt, net ei korvata ekotaksin kululoi.