Kemin Uspenjan piäkirikön šäilyttämini oli seminaarin teemana, kumpasen piti Venäjän puuarhitektuurin keškuš. Seminarin aikana entistäjät tuttavuššuttih restauroittuh puumuistomerkkih – Uspenjan kirikköh, kumpasen ikä on šama, kuin tunnetulla Kižin piäkiriköllä.
Kemin kotišeutumusejošša restaurattorit keškuššeltih šuoritetušta ruavošta, kerrottih vaikeukšista, uušista kokemukšista.
– Oli šurullista, konša restauroinnin alušša emmä nähnyn kirikkyö, vain šen šalvon hiršijä ta pohjan kivijä. Pelkäsimä vähän, onnistuuko noštua kirikkyö uuvveštah. Ta kuin iloista oli, kun näkimä ruavon hyvän tulokšen – uuvvissetun kirikön, kerrottih seminaarin ta restauroinnin järještäjät.
Jokahisen kirikön entistäjän muistissa jäi hetki, kumpani oli heilä tärkeimpänä koko ruavon aikana: ristin ašettamini kupolin piällä, vanhojen oprasien šuamini omalla istorijallisella paikalla, šalvon rakentamini ta toisie.
Kemin piirin ta kaupunkin piämiehet kiitettih entistäjie kaupunkin piänähtävyön šäilyttämiseštä ta tuttavuššuttih šuunnitelmah, kumpasen mukah piäkirikkyö ruvetah šuojelomah ta šen lähellä olijua istoriallista alovehta kunnoštamah ta kehittämäh.
Seminari piettih Fennoskandijan etnoarhitektuuri XXI-vuosišualla -projektin rajoissa.