Enämbi sada hengie on vallittu Karjalan urhoit -programmah
Karjalas on loppevunnuh Karjalan urhoit -programman verkovalličus, kuduan avul on vallittu 107 hengie enämbi migu 200 pyrgivynnyös. Heijät javotah kahteh joukkoh. Yksi joukko, kuduas on 30 hengie alguau opastundan syvyskuus. Toizes joukos on erillizeh voinuoperatsieh yhtynytty, kuduat juuri nygöi ollah voinuoperatsien alovehel. Hyö voijah algua opastundat, konzu kiännytäh Karjalah. Sih nähte kerdoi Karjalan piämies Artur Parfenčikov VKontaktas.
— Lähiaigua jogahine heis piäzöy läbi pagizutandas. Se kestäy kezäkuun 20. päiväh suate, kerdoi Parfenčikov VKontaktas.
Erillizeh voinuoperatsieh yhtynyzien opastamizeh yhtyy toizien luvus kul’tuuru- da opastuslaitostu. Programman todevuttamizeh ollah yhtytty sežo Karjalan kanzallizen muzein ruadajat. Sih nähte andau tieduo Respublika-uudistoimisto.
— Syvyskuus huavuammo algua enzimäzen opastunduvuoron. Kaikkiedah niidy on nelli. Programmah yhtynyöt kävväh muzeih da Mihail Gol’denbergan da hänen kolleegoin piettävih luvendoloih Ven’an da Karjalan histourieh nähte, sanoi Karjalan kanzallizen da alovehellizen poliitiekan varaministru Natalja Barinova uudistoimistole.
Karjalan kanzallizen muzein piälikkö Mihail Gol’denberg kehoitti opastusprogrammah tuttavusmatkoi. Opastamizen aigah programmah yhtynyöt voijah kävvä Karjalan frontan muzeih.
— Rodieu hyvä, ku programman luadijat ruvetah ruadamah yhtes muzein, arhiivan da kirjaston kel. Net ollah muston tärgevimät säilyttäjät. <…>. Histourii ei ole vai tiedoala, se on enne kaikkie kogemus. Ilmai kogemustu ei sua johtua, kerdoi Karjalan kanzallizen muzein johtai Mihail Gol’denberg uudistoimistole.
Alovehelline programmu ”Karjalan urhoit” on federuallizen Urhomiehien aigu -programman jatko. Programman tarkoituksennu on auttua erillizeh voinuoperatsieh yhtynyzile suaja uuttu tieduo da ruadosijua tazavallan laitoksis da virrastolois.
Aihies voit lugie suomeksegi.
