“Elonpu” Šoutjärves mäneškab vanhoiden tradicijoiden mödhe
Šoutjärves udessündutadas “Elonpu”-praznik. Sen tem om omištadud penile der’ounoile. Necil vodel adivoil linneb voimuz čukloutas praznikan vanhoiže tradicijoihe.
Šoutjärves 20. kezakud, sobatan, mäneb tradicionaline vepsläine “Elonpu”-praznik. Adivoiden täht vaumištadas melentartuine programm. Praznikal ezineškaba pajo- da kargkollektivad Karjalaspäi da Piterin agjaspäi: “Vepsän rahvahan hor”, “Randaine”, “Varasta”, “Toive”, “Kičči-kočči” i toižed. Mugažo kuctihe erazvuiččid mastarid.
— Praznikavaiduz linneb Šoutjärven vepsläižen etnografižen muzejanno, kut nece oli ende. Jäl’ges linneb sädaikollektivoiden astund pajoidenke muzejaspäi Änižen randahasai, kus mäneškab koncert. Vaumičemoiš praznikaks iče, tahtoim, miše se oliži kut minun laps’aigal. Rahvaz lujas varastab praznikad, sanui Šoutjärven Kul’turpertin pämez’ Jevgenia Kokorina.
Praznikan aigan adivod voiba tundištadas kudondanke, ostta muštlahjoid, ühtneda mastar’-klassoihe da sportvoibištelendaha, paštta kalitoid. Lapsiden täht linneb erine programm.
Tarkištele "Oma Median" MAX-kanalad!
