Eloho läksi verez “Kodima”-lehtesen nomer
Om pästtud eloho uhokun “Kodima”-lehtesen nomer. Sen pätemaks om tehtud vepsläižed runoilijad i heiden panend vepsän rahvahan kul’turaha. Lehteses om kirjutesed siš, kut mušttihe Nikolai Abramovad Karjalan Rahvahaližes kirjištos da Podporožjen keskuzkirjištos. Podporožjes jo kümnen voden aigan tehtas festival’, mitte om omištadud necile surele runoilijale.
Mugažo literaturine tem jatkui Karjalan Valdkundan Rahvahiden sebruden kodiš, kus mäni koumen vepsläižen runoilijan — Nikolai Abramovan, Ol’ga Žukovan i Alevtina Andrejevan — mušteht. Vastusele kerazihe heiden sebranikad, ühtesradnikad, sädandradon navedijad, “Vepsän kul’tursebran” da “Vepsläižed besedad” -paginkluban ühtnikad.
Ivan Gul’ajev kirjuti suren da melentartuižen kirjutesen tetabas vepsläižes runoilijas da vepsän rahvahan kaičijas Viktor Pavlovič Trifojevas — eläban da lämän starinan ühten tundištoitusen polhe.
2026. voz om tärged päivmär Vepsän rahvahan horan täht — sille täudub 90 vot! Sikš aigtegoks Šoutjärven muzejas radaškanzi uz’ ozuteluz, mitte starinoičeb horas erazvuiččiden kaluiden da fotokuviden abul. Tarktembad tedod ozuteluses voib löuta “Kodiman” udes nomeras. Mugažo lugijoil om voimuz tedištada, kut Šoutjärves praznuitihe školan 220-vozne jubilei.
— Uhokus Karjalas praznuitas “Kalevalan” päiv, sikš meiden toimišt vaumišti sanaristikon, mitte linneb melentartuižen kut lapsile, muga aigvoččile-ki. Se abutab pörttas “Kalevala”-eposan tekstaha da völ kerdan muštta armhid hengid i tekstan sijoid, sanui “Oma Media” -portalale “Kodima”-lehtesen pätoimitai Irina Sotnikova.
Uhokun “Kodimas” zavottihe kirjutesiden cikl Anna Anhimovan gastronomižiš ekspedicijoiš: neciš nomeras voib lugeda matkoiš Voknavolok- da Juškozero-külihe.
Johtutam, miše “Kodima”-lehtez jagadas maksuta.
Tarkištele "Oma Median" Telegram-kanalad!
