Eloho läksi völ koume audiokirjad vepsän kelel lapsiden täht

Audiodiskoid čomenzoiti pirdai Darja Hil’. 6+. Kuva: Larisa Čirkova

Täl vodel nored vepsläižed aktivistad lugiba än’heze runoid da starinoid vepsän kelel professionaližes studijas. Kaiked oli anetadud koume kirjad: Ol’ga Žukovan ”Mäthudel” da ”Ezmäine änik”- runokogomused da Nina Zaicevan ”Izo Lizoi”-kirj vepsän kelel. Nügüd’ nene čomad audiodiskad läksiba eloho. 

— Kaik, ked ühtniba audiokirjoiden änetamižehe, oma tehnuded tarbhaižen radon. Nece om sur’, čoma ühthižradon satuz. Eloho läksi völ koume audiokirjad. Nece om enamba 70 runo- da prozatekstad, miččed starinoičeba londuses, mecživatoiš, linduiš da lapsiden holiš, melentartusiš, sanub Vepsän kul’tursebran pämez’ Larisa Čirkova.

Uziden audiokirjoiden prezentacijoid tehtas kaikiš Änižröunan školiš, a mugažo Petroskoiš. Ezmäine mäneb jo 14. redukud Šoutjärves.

Johtutam, audiodiskad tehtihe Vepsän kul’tursebran ”Kel’ — minun Kodima”-projektan aigan Karjalan pämehen grantoiden fondan raha-tugele.