Viime vuuvven šykyšyllä Karjalan Šivissyššeura paino Santra Stepanovan kirjan “Elämäni polku – Šombajärven kylän istorija šekä muisselmie miun elokšešta”. Karjalan Šivissyššeuran ruatajat heti šovittih Periodika-kuštantamon kera, jotta oša painokšešta työnnetäh “Periodikah”, mistä šiitä kirja on šuatavilla. Ka koronatilantehen takie lähettyä kirjat onnistu vašta tänä kevyänä.
– Periodika-kuštantamo hyvällä mielellä jatkau yhteistyötä Karjalan Šivissyššeuran kera. Aleksandra Stepanovnan uuši kirja on julkaistu Šuomešša ta šitä voipi oštua Karjalan Šivissyššeuran kaupašta. Šitä varoin, jotta Karjalašša eläjä lukija niise šais mahollisuon ottua käteh Elämäni polku -kirjan, painokšen oša (150 kappalehta) työnnettih “Periodikah”. Meijän tehtävänä on työntyä kirjan kappalehet tašavallan kaikkih kirjaštoih šekä karjalaisih etnokulttuurikeškukših, kanšalaisjärještöih, laitokših, kouluih, missä opaššetah karjalua. Tämä työ jo alko, kertou Periodika-kuštantamo johtaja Natalja Sinitskaja.
Santra Stepanovan Elämäni polku -kirja on kirjutettu vienankarjalakši. Šiinä on nellä ošua ta melkein 400 šivuo. Kirjan enšimmäini oša käsittelöy Šompajärven kylän istorijua ta toisešša ošašša paissah kylän taloista ta niijen eläjistä. Šiinä on tosi äijän šukututkimuštietuo. Kolmaš oša, voit olla luajin oša, kertou Aleksandra Stepanovnan omašta elämäštäh ta elämän vaiheistah. Ta nellänneššä ošašša folkloristi esittäy lukusie esimerkkijä Šompajärven šuullisen perintehen eri lajiloista.
Oštua Elämäni polku -kirja šuau Periodika-kuštantamošta.