Eläb vepsän sana: uz’ ”Verez tullei”-al’manahan nomer läksi eloho
Uz’ vepsänkeližen ”Verez tullei”-al’manahan nomer läksi ”Periodikas”. Sen lehtpolil voib löuta prozad, runoid, kirjutesid melentartuižiš ristituiš, kul’turas da istorijas. Avtoroiden keskes oma tetabad vepsläižed kirjutajad da runoilijad. Al’manahan pätem om 80 vot Surele Vägestusele, sikš al’manahan päsijal om Rürik Loninan povest’ ”Voinal korbetud laps’aaig”. Nene om johtutesed ristituiš, kudambad eliba okkupiruittud sil aigal Šoutjärven rajonas.
— Nomeran avaidab Nina Zaicevan päkirjutez vepsän kirjkelen kehitoituses, ezmäižiden abekirjoiden da openduzkirjoiden tegendas, openduses školiš da vepsläižen literaturan sündundas. Voin rohktas sanuda, tämbei vepsän kel’ hüvin kehitoitase i necidä todištab al’manah, necil vodel om paindud jo 15. nomer, sanub al’manahan toimitai Irina Sotnikova.
Al’manahan tegijad ei unohtanugoi lapsiš-ki. Heiden täht om čomad runoižed, starin da sarnad. Mujukahil al’manahan lehtpolil oma fotokuvad, kus oma koumen regionan vepsläižiden ezitajad, a mugažo vepsläižiden küliden londuzkuvad. Pirdatusid al’manahan täht pirdi Darja Hil’.
Al’manahan voib ostta ”Periodika”-paindištos. Sen maks om 130 rublad.
Uzišt neciš temas voib lugeda mugažo venäks.
