Dorogat luajittih – kivet-kannot kai matkal murrettih
Ven’an prezidentan kehoitukses rattahile pannuon kanzallizen projektan mugah ”Infrastruktuuru elaigah nähte” tänä vuon alletah perustehellizesti kohendamah tiedy, kudai vedäy Uvven Vilgan kyläh.
Kyläs eläy enämbi 2, 5 tuhattu hengie. Dorogu kyläh suurel juamalpäi pitkän aigua jo on huonos kunnos. Paikallizet eläjät mondu kerdua kiännyttih Karjalan transportan ministerstvan puoleh tämän problieman sellittämizekse.
— Enne vaigu paikoittain kohendettih, sie-tiä luajittih paikat dorogah. Lumen da vien kel čuurut, kivyöt da asfal’tat lähtiettih iäres. Jo ammui vuotimmo, ku dorogua ruvetah kohendamah perustehellizesti da pitkäkse aigua. Ihanhäi Petroskoin linnan tyves elämmö, sanoi Oma Mediale paikalline eläi Polina Sinitskaja.
Dorogan kohendamizen projektan mugah uvvistetah ajotien pinnan piälystehet, luajitah trotuarat da vihmuvienviemäri, vaihtetah vienlaskutruvat, azetetah tien aijoitukset da tiemerkit.
Tien perustehelline remontu korrendau ajotien luaduu, luadiu ajamizen mugažakse da turvallizekse ajajih da jallai astujih nähte.
