Blogeran rad abutab kingitada turistoiden homaičust Karjalaha
Anna Anhimova ühtneškab “TopBLOG”-projektaha, miše kehitoitta ičeze kanalad Telegramas.
“TopBLOG” om maksutoi “Venäma — voimusiden ma” -platforman openduzprojekt, miše avtor voiži oikti antta miččid-se tedoid (kontentad) ičeze lehtpolel socialižiš verkoiš: Vkontakte, Odnoklassniki, Dzen, Telegram, Yappy, RUTUBE. Täl vodel oli sur’ konkurs: oli oigetud 8352 pakičust, finalaha tuli 480, niiden keskes om “Kiži”-muzejan radnik Anna Anhimova, kudamb vedäb ičeze kanalad Telegramas.
— Minun kanal andab voimusen tundištadas elonke Venäman Pohjoižel. Erine minun armastuz om Karjalan tradicionaližed sömižed. Sikš ezmäi minä zavodin starinoita kanalal Karjalan keitimpoles, sömižiš, no sid’ ristitud pakičiba starinoita Karjalas, küliš, minun matkoiš da elos Pohjoižel. Nügüd’ minä starinoičen Karjalan rahvahiš. Iče olen vepsläine, a heid mirus jäi läz vit tuhad. Tedištagat uzištod minun Telegram-kanalas, sanub Anna.
Openduzprogrammaha mülüb 40 akademišt časud. Jäl’ges opendust kaikutte ühtnik sab diploman professionaližes ližaopenduses.
— Tämbei mir muga hotkas vajehtase, läz 55 % mest jo uskoba blogeroile. Statistikan mödhe, mas om enamb 10 tuhad blogerad, pidab opetas radmaha socialižiš verkoiš i kucta rahvast ičeze azjtegoile, kingitada homaičust ičeze agjaha, lidnha, külähä.
