Biblii joga taloih: kerdomuksii suau kuunnella livvikse
Karjalan Jevangelien uskon kirikkö da Biblien kiändäjien Uiklif-joukko paikallizien eläjien kel kiännettih Biblien kerdomuksii karjalan kielen kahtele murdehele: vienakse da livvikse. Kerdomuksii kiännettih da tallendettih plejeroih. Nygöi jogahaine, ken tahtou kuunnella Biblien tekstoi karjalakse, voibi suaha ičele plejeran. Vienalaine kiännös oli valmis jo tuhukuus, livvinkielizii kerdomuksii ezitettih vaigu täl kuul projektan kolmes tärgies paikas – Petroskoil, Anukses da Vieljärves.
Vuvvennu 2021 Karjalan Jevangelien uskon kirikön pappi Anatolii Saveljev tuttavui Uiklif-joukon rahvahah. Joukko ruadau Biblien kiändämizeh niškoi da tuli Karjalah kiändämäh Biblien kerdomuksii vienakse. Hyö ei tietty livvin murdeheh nähte nimidä. Iče liygiläine Anatolii Saveljev taričči heile vie ottua ruadoh livvin murreh. Nenga algoi heijän yhteisruado.
Kiändiä pyhii tekstoi ei ole kebjei ruado da sih ruadoh ei päi jogahine. Uiklif-joukol on luba kiändiä niilöi, hyö työnnettih karjalazih kylih omii abuniekkoi, gu protsessu menis oigieh. Nämmä volont’ourat avutettih kiändäjii kirjuttamah tekstoi da käydih yhtes lugemah niilöi paikallizile eläjile, gu löydiä hairavoloi. Sidä luajittih äijän kerdua, gu kiändiä tekstat oigieh.
— Minä ruavoin äijis kohtis Karjalas. Vieljärveh tulin 2,5 vuottu tagaperin. Tiä ruavoimmo yhtes karjalan kielen kiändäjien Nina Barminan da Svetlana Jegorovan kel. Kiänimmö da tarkastimmo tekstoi toizien karjalazien kel. Minuu ihastutti, kui karjalazet suvaijah omua kieldy, hyö vastavuttih meijän kel hyväl mielel, sanoi Oma Mediale Uklif-joukon abuniekku Moskovaspäi Ol’ga Korotkova.
Projektan mugah pienih plejeroih on kirjutettu 23 kerdomustu livvin kielel, niilöin luguh on ližätty Jevangelii Lukan mugah ven’akse. Se on nygyaigaine pieni laiteh. Ližäkse projektas luajittih programmu telefonah niškoi, kudamah pandih kai Biblien kerdomukset. Vie tahtotah painua kerdomuksii kniigannu.
Livvinkielisty plejerua on läs 450 kappalehtu da vie on 100 vienakse. Jogahine voibi suaha niilöi maksamattah, pidäy vai kirjuttua projektan joukon VK-sivule.
Yhty Oman Median MAX-kanalah!
