Biblien kerdomuksii nygöi voibi kuunnella karjalan kielel
Karjalan Jevangelien uskon kirikkö da Biblien kiändäjien Uiklif-joukko kiännetäh Biblien kerdomuksii karjalakse. Vienakse niidy voibi kuunnella jo tänäpäi, livvin murdehele kiännös rodieu valmis kuun peräs.
Biblien kerdomuksien karjalakse kiändämizen projektan piälikkö Anatolii Saveljev pakkaskuun lopus sai posilkan, kuduas oldih karjalakse iänitetyt Biblien kerdomukset. Pienel sähkölevyl on nauhoitettu Biblien 24 kerdomustu vienan murdehel.
Projektan tavoiteh on luadie pyhän tekstan opastumine kaikkienellendättäväkse. Pienet iänenkandajat voibi ottua keräle kalah, meččäh mennes libo kuunnella niidy kois. Laittehet ruatah batareikan vuoh, niilöi voibi täyttiä päiväzen valgies. Projektan joukko ližäkse luadiu programmua telefonah niškoi, kudamah pannah kai Biblien kerdomukset. Net painetah kniigannugi.
— Vuvvennu 2021 minä luvin Uiklif -joukon žurnualan, kačoin heijän saitan internetas. Ugodih juuri muga, ku heijän joukko tuli kolmen päivän peräs Karjalah. Tiijustin, gu hyö tahtotah luadie kiännös vaigu vienakse. Minä ellendin, gu Jumal andau minule valdua levittiä projektua, minulhäi ollah liygiläzet juuret. Nenga algoi meijän yhtehine ruado, sanoi Oma Mediale Anatolii Saveljev.
Biblien kerdomuksien kiännös on suuri da jygei ruado. Ilmai Biblien kiändäjien Uiklif-joukkuo tädä projektua ei suannus todevuttua, sendäh gu juuri sil on kanzoinväline Biblien kiännöksen luba. Projektas oli luajittu kaksi joukkuo — vienalaine da liygiläine. Kiändämizen ruado algavui vuvven 2022 lopus. Sit aijas on pietty sadoi vastavundoi da ajeltu monii sadoi kilometriloi.
— Vienalazien joukos oli 7—8 hengie, suves ruadau läs 15—20 hengie. Sen ližäkse on arvostelijua, kuduat suadih hyväksymistu kielentiedäjispäi, jatkau Anatolii.
Livvikse kiändämizen ruado nygöi on loppevumas. Livvikse iänitetyt kerdomukset tahtotah piästiä Äijäksepäiviä, kudai tänä vuon on 12. sulakuudu. Livvinkielisty iänenkandajua rodieu 450 kappalehtu.
Iänenkandajii ruvetah jagamah paikallizen rahvahan keskes ilmai. Gu tahtonetto suaha sen, kirjutakkua Biblii karjalan kielel -joukon VK-sivule.
Yhty Oman Median kanualah Telegramas!
