Barencan regionan muzikantoid ühtenzoiti kalatesen tem
”Fiskelykke” norvegian kelespäi kätas, kut ”Oza kalatesel”. Projektan tegijad ühtenzoitiba Barencan regionan rahvahid, miččiden elotahod oma veziuitoidenno da miččiden elo om sidotud kalatesehe. Nimi kuvadab sidä tundmust, mitte om ristitul suren kalan samižes.
Projektaha mülüb kaks’ palad. Ezmäi 11. kül’mkud ezitajad reginoišpäi lugiba lekcijoid, miččed oli omištadud kodiröunale da rahavahan muzikale. Karjalan igähižiš rahavahiš starinoiči ”Kodima”-lehtesen toimitai Galina Baburova, a muzikaližen lekcijan Karjalan rahvahiden vändimiš vedi muzikant Vladislav D’omin. 13. kül’mkud mäneb koncert, miččehe ühtneba muzikaližed kollektivad ezitadud regionoišpäi.
– Projektan toine pala – Barencan regionan ravhahiden muzikaline festival’, mitte planuitas pidäda ezmäižen kerdan 2022. voden heinkus Norvegian Rödöi-kommunas, sanub muzikanoppii, üks’ projektan tegijoišpäi L’udmila Sokolova.
Tulijal aigal planoiš om kucta ezitajid Barencan regionan toižiš-ki agjoišpäi.
”Fiskelykke” tegeba Rödöi-kommunan muzikškol, ”Arktika”-kul’turpert’ (Narjan-Mar), Karjalan orkestrsebr.
Vastused mäneba Inetrnetas online-režimas. Enamaba ”Fiskelykke”-projektas i lekcijoiden da koncertan transl’acijoid voib kacta täs.
