Artur Parfenčikov: ”Arktiekan” kanzalline projektu voibi lujendua Karjalan transportupotensiualua
Karjalan tazavaldu kannattau erillizen kanzallizen Arktiekku da Pohjaine meritaival -projektan luadimistu. Sih nähte ilmoitti Murmanskas piettäväs Kanzoinvälizes arktiekkufourumas Karjalan tazavallan piämies Artur Parfenčikov.
Tulien kanzallizen projektan eräs tärgevimis kohtis on Pohjazen meritaibalehen kehittämine.
Arktiekan monipuolistu kehitysty šeikuittih Ven’an Federatsien Valdivonnevvoston yhtehizes istundos, kuduan ruadoh yhtyi Ven’an prezidentan avvuttai, Merikolleegien piälikkö Nikolai Patrušev. Uvven ”Arktiekan” kanzallizen projektan luadimine on tärgei askel pohjaismualoin sotsiualu-, eländy-, transportu-, energeetiekkuinfrastruktuuroin teriämbäs kehittämizes.
Se andau uvvet mahtot meijän muan turvuamizen lujoittamizekse, pohjazes eläjien rahvahien eländytazon korrendamizekse, ekolougizen hyvyön säilyttämizekse, uvven opastusymbäristön luadimizekse Ven’an Arktiekas.
Karjalan tazavaldu aktiivizesti yhtyi kanzallizeh projektah.
— Meijän tazavallan mualois lähes 40 protsentua kuulutah Arktiekkah. Karjal on tärgei kohtu Murmanskan valgamoh piästes. Meil ollah ylen tärgiet pluanat sidä taivaldu kehittäjes. Meil on valmis Kemin-Belomorskan aglomeratsien master-pluanu. Erinomastu huomivuo kiinitämmö risteilymatkailuh Valgielmerel. Meijänhäi tazavallas algavuu Arktiekkah tuttavumine luodehes, sanoi Artur Parfenčikov omassah lehtistöpalvelule.
