Petroskoissa esitettih uuši projekti, kumpani yhistäy musejojen ruatajie ta digitaliteknologijien spesialistija. Heilä on šama harraššuš – eččie mukavie tietoja Petroskoin istorijašta ta ihmisistä, löytyä arhiivoista tietoja ta luatie ne mukavammiksi ta yleisöllä helpommin ymmärrettäviksi.
ZAVOD’-nimini projekti oli esitetty Petroskoissa CreatePtz-tilašša. Salih keräyty aivan eri ikäryhmien ihmisie: nuoret koululaiset, ylioppilahat, musejoalan monivuotiset spesialistit.
— Nyt valmissamma mediaportali, kumpaseh rupiemma panomah istorijallisie tutkimukšie eri muotoloissa: video- ta piirrošfilmilöina, esittelyinä, virtualiretkilöinä. Myö iče tahomma tutkie uušie teemoja ta kertuo nämä tiijöt kaikilla, ketä še niise kiinnoštuu šekä auttua niitä, kumpaset tahotah ošallistuo Petroskoin istorijan tutkimiseh, šelitti projektin spesialisti Anna Potašova.
Projektin esittelyn rajoissa oli pietty lyhyijen luventojen ilta. Šai tiijuštua Oneganniemen merkkaukšen arhiivoih panomisen projektista, dokumenttielokuvien kuvaukšien šaloista, tiijuštua mimmosien tehtävien avulla voipi kehittyä mielikuvitušta, jotta juttujen kertomini olis mukavammakši šekä tuttavuštuo Petroskoin yliopiston filologijan laitokšen opaštujien Kieretin-kyläh tutkimušmatan tulokših.