Anuksen piirin kolmeh kyläh on avattu vuogravokohtat
Anuksen piirin kolmeh kyläh on avattu vuogravokohtat. Sie ilmai voibi suaja voimistelu- da muatalovuslaittehii. Ruavon on pannuh rattahile Solnečnii-lapsien abukeskus.
Paiči pyörii, miäččylöi, tennissu- da badmintonkogomuksii, suksii da vatruška-regyzii tiä voibi ottua vuograh labjat, haravat, leikat, ongiruagat, palatkat da äijy muudu pättäviä.
On avattu kolme vuogravokohtua — Kotkatjärveh, Žil’čoih da Alavozeh. Ottua vuograh on kebjei. Ristikanzu soittau keskuksen ruadajile telefonoih, kuduat ollah tietois da sijoitettu Solnečnii-lapsien abukeskuksen VK-sivule, valliččou tarvittavat vehkehet da sobiu, kui hätkekse ottau niilöi vuograh.
— Nygöi räkel siäl kaikis kyzyttävimät ollah miäčyt, palatkat, magavohuavot. On lapsii, kudamil ei ole omii pyörii, heile otetah pyörät meijän vuogravokohtas. Tänäpäi huondeksel soitettih da kyzyttih jättiä pereheh niškoi palatku — rahvas perehinneh mennäh Luadogan randah huogavumah da kalastamah, sanoi Margarita Ijevleva, Kotkatjärven vuogravokohtan emändy.
Solnečnii-lapsien abukeskus on avannuh vuogravokohtat Kotkatjärven školan, Alavozen kylänevvoston, Vstreča-TOS:an, Nurmoilan kellozet -TOS:an avul. Net tarittih tilat vuogravokeskuksile. Vuogravokohtat ruatah tämän nedälin allus algajen, ga pluanois on niilöin ruado ymbäri vuvven.
Vuogravokeskukset ruatah Absol’ut-Pomošč-hyvyönluajindufondan lahjoituksil.
