Anuksen muatalovusalovehii kehitetäh
Anukses federuallizen Muatalovusalovehien nygyaigaine nägö -projektan mugah jatkuu sotsioalan da sportuinfrastruktuuran objektoin uvvistamine.
Eräs suurimii projektoi on Ukonvemmel -päivykoin remontu. Vuvvennu 1991 nostetun rakenduksen syväimes kai rodieu uudeh luaduh: tiä uvvistetah perilöi, luajitah uvvet inženierukommunikatsies, levot da oččuseinät, kohendetah lämmitys-, sähkö-, tulipalo-, vientuondu - da viendysistiemoi. Kunnostetah lapsien päivykoin rinnal olijoi mualoigi.
Karjalan mua- da kalatalovuon varaministru Andrei Kvasnikov käi Anuksen tarkastamah remonturuadoloi.
— Lapsien päivykois pietäh suurdu remontua. Nygöi on tärgei ielleh ruadua ruttoh, ku tulien vuon lapset voidas tullah nygyaigazeh da mugažah rakendukseh, sanoi Andrei Kvasnikov Karjalan piämiehen lehtistöpalvelule.
Ukonvemmel-päivykoin kohendamizeh pannah 250 miljounua rubl’ua. Enimät varat on suadu federuallizes b’udžietaspäi, ga tärgei rouli on paikallizil muatalovusalan laitoksilgi, kuduat annettih omua varua remonturuadoloih.
Ruadoajeluksen aigah Kvasnikov sežo tarkasti sportukentiä, kuduadu käytetäh tennissah, jalgu-, verko- da verkopezämiäččyh kižates, talvel tiä kižatah jiäkur’oidu. Sportukentän kohendusruavot loppietah ligakuus. Nämmih ruadoloih käytetäh miljounu rubl’ua.
Yhty Oman Median kanualah MAX:as!
