Alovehellizet tiet: kohendamine jatkuu vuvvennu 2026
Kanzallizen Infrastruktuuru elaigah nähte -projektan mugah huavatah panna kundoh alovehellizien tielöin enämbän 87 kilometrii, niilöin luvus autotiet, kuduat kuulutah Ven’an tugiverkoh.
Kaikis tärgevimät palat ollah nämmä: Voinnini—Vuokkiniemi—Kostamus—22 kilometrii, Anus—Pitkyrandu—Leppysildu—kaheksa kilometrii, Kola-autotie—Kalevala—Lonka—23 kilometrii. Kai nämmä tulou panna kundoh vuodeh 2027 suate.
Paiči sidä vuvvennu 2026 loppietah tänä vuon alletut perustehellizet Uvven Vilgan autotien da Kondupohjan Promišlennii projezd -tien kohendamizet.
— Jatkammo Voinnizen tien kohendamistu. Se on tärgei paikallizile eläjile. Kohendammo tielöin objektoi Suojärves, azetammo tulipaččahat. Jogahizen projektan kohtah, kuduat tarvitah remontua, ollah konkreettizet perspektiivat, tovellizet pluanat. Myö panimmo kundoh alovehet Petroskoin raudutie- da avtoazemoin kohtas, sen vihjatah linnalazet da tulluot rahvas. Nygöi sie on mugažu azetuskohtu, sanoi Karjalan piämies omassah lehtistöpalvelule.
Vuvven 2025 tärgiekse tapahtumakse Karjalan piämies sanoi Lohijoves poikki Maršal Meretskovan pihua myöte matkuajan sillan kohendamistu, kudai piettih kogonah alovehellizil varoil. Sen hindu oli piäl 2 miljardua rubl’ua. Sildu levendettih nelläh ajojunoh suate, se kebjendäy da rutostau ajamistu. Remontan aigah on luajittu leviet kävelykohtat da pyöril ajajih niškoi omat tilat.
Karjalan tazavaldu rodih erähänny parahimis alovehis, kudamis todevutettih Infrastruktuuru elaigah nähte -projektua. Diploman finansudistsiplinan korgies tazos Karjalan piämies on suannuh Ven’an haldivon varapiämiehes Marat Husnullinan käzis Moskovas pietyn Ven’an transportu -fouruman aigah.
Yhty Oman Median kanualah Telegramas!
