Čalnan školan lapsed čukloutihe vepsläižiden sarnoiden miruhu
Vepsän kul’tursebran ühtnikad tegiba vastusen Pr’ažan agjan ”Tuomi”-etnokeskuses, kuna tuliba Čalnan školan koumanziden klassoiden openikad. Lapsed tundištoitihe vepsläižidenke kirjutajidenke, kudambad kirjutaba lapsiden täht. Penile adivoile ezitadihe koume kirjad: Ol’ga Žukovan ”Ezmäine änik”, Natalja Silakovan ”Nel’l’ dölod” i Gul’a Polivanovan ”Armaz sarnaine — heled ojaine”. Kaks’ ezmäšt kirjad paindihe ”Periodikas”. Lapsed hüviš meliš kundliba sarnoid venän kelel, a jäl’ges surel tahtol ühtniba kvizaha sarnoiden mödhe.
— Mugoižed vastused oma tarbhaižed, ned levenzoitaba tedoümbrusen lapsil. Mi koskeb sarnad, necil vodel meil oli projekt ”Sarnad öks”. Vastusile tuleskeliba lapsed vanhembidenke kerdan kus. Mö ozutim heile sarnoid karjalaižid, venälaižid. Iče omblem tätüižid sarnoiden täht. Tuli mel’he teiden sarn pirgvärtimen polhe, otam sen, miše ozutada sidä lapsile scvenal, sanui etnokeskusen pämez’ Natalja Vladimirovna Fomina.
Vastuz mäni ”Kel’ da kul’tur: tämbei, homen, kaiken”-projektan aigan, mitte todenzoittas eloho Karjalan valdkundan pämehen grantoiden Fondan tugele.
