Čalnan eläjien kertomukšie on ikuissettu dokumentissa
Inkerinšuomelaiset kerrottih elämäntarinoja uuvvešša dokumentissa “Sodan leimaamat kohtalot”. Tuntehie liikkujašša filmissä on perhearhiivoista löyvettyjä valokuvie, arvokkahie dokumenttija, lämpimie muisselmie ta kertomukšie. Monet šankarit paissah šuomekši tahi inkerin murtehella, kummaista hyö harvoin nyt käytetäh arkielämäššä.
Filmi kuvattih Čalnašša viime vuotena, yleisöllä še oli esitetty 17.–18. tuiskukuuta Omin šilmin -ohjelmašša Rossija 1 -kanavalla. Nyt filmie šuau kaččuo ni YouTube-kanavalla.
– Tämän dokumentin valmistamini oli miula viime vuuvven tärkeimpänä tapahtumana. Šen teema on hyvin tärkie ta šyvällini. Jokahisen šankarin kertomuš jäi mieleh. Ymmärrän, mintäh eryähät itetäh, kun kačotah filmie. Ičellä šilmät oltih täyvet kyynälie filmin leikkaukšen aikana, filmin leikkaukšen ohjuaja Uljana Tikkanen kerto.
Filmin kuvaukšet piettih viime vuuvven šykyšyllä. Niih mäni kakši päivyä, ka filmin leikkauš otti äijyä enemmän aikua.
– Piti, jotta koko materialista – kuvatuista videoista ta arhiivavalokuvista – tulis kokonaisuš. Piti valita šopivua musiikkie, kumpani auttais ymmärtyä ihmisien tuntehie, Uljana jatkau.
Filmi on Sodan leimaamat kohtalot -projektin ošana. Projektie on toteuttan Zdorovje Karelii -hyvänluajintašiätijö Karjalan tašavallan kanšallisen ta alovehellisen politiikan ministerijön rahotukšella.
Filmie šuau kaččuo täššä.
