Almanakka: "Taival" näki päivänvalon
Vereš “Taival” on jo nelläštoista. Enšimmäini almanakka näki päivänvalon vuotena 2006.
– Nämmien vuozien aigah Taival-almanuahan sivuloil on painettu kuulužien da vaste kirjuttamah livunnuzien kirjutuksii – prouzua, runuo, mustelmua, tutkimustu. Myö olemmo hyväs mieles, ku tänäpäigi kirjutukset, kuduat tyo työnnättö da tuotto almanuahah, ollah kirjutettu meijän kielel – karjalakse. Da jogahizes kirjutukses nägyy oman kielen da oman rahvahan suvaičus, tunduu huoli niilöin tulies aijas, koroštau almanakan toimittaja Ol’ga Smotrova.
Tämän vuuvven almanakan kanšiloih on kerätty erilajisie kirjutukšie karjalan kielen livvin ta vienan murtehella. Omie muisselmie kirjutettih Vilho Kivisalo, Raisa Remšujeva ta L’ubov’ Baltazar. Aleksandra Lesonen Rakkahuš ta Viena -kirjutukšeššah šanelou karjalaisen kulttuurin Viena-šeuran toiminnašta.
Almanakan ainasen kirjuttajan Santra Stepanovan artikkelista šuau lukie, kuin Aunukšen piirissä kerättih karjalaista folklorie. A Nikolai Filatovin materialin kautti šuau tunnuštua kuulusan karjalaisen miehen.
– Tavan mukah on mitä lukie ni runojen harraštajilla. Runoniekkojen joukošša tällä kertua ollah jo tutut karjalaisilla lukijilla nimet: Sergei Jakovlev, Valentina Libertsova, Vasilii Veikki ta L’ubov’ Baltazar, šanelou almanakan toimittaja Maikki Spitsina.
Tänä vuotena kirjailija Pekka Pertun šyntymäpäiväštä taytyy 105 vuotta. Vuosipäiväkši vienalaini Valentina Karakina kiänti kolme hänen tevošta. Šamoin Prousa-rubrikissa on esitetty Valentina Kondratjevan, Galina Ol’kinan, Ol’ga Smotrovan ta Natalja Sinitskajan kertomukšet.
Vuotena 2022 Venäjällä pietäh šuurie toimenpitoja, mit on omissettu Pietari Šuuren 350-vuotispäivällä. Tällä merkkipäivällä on omissettu Valentina Mironovan kirjutuš “Pedri, kuulužu kuningas”.
Vereš Taival-almanakka vašta ilmešty, a šen toimittajat jo šuunnitellah šeuruavan numeron luatimista.
