Algavui Ven’an rahvahien perindöllizien elostuksien da kižoin kilbu
On pandu rattahile kogo Ven’an taidokilbu ”Ven’an rahvahien perindöllizet kižat da elostukset”. Kilbah kučutah kul’tuuran da opastuksen alan ruadajii, taidojoukkoloi, nuorižuo da yliopastujii.
— Ven’a on suuri monikanzalline mua, kuduan jogahine kanzu säilyttäy omii perindölöi da kul’tuurua. Tämän kul’tuuran eräs tärgevimii elementoi on kanzallizet kižat — lapsien, nuorien, sego veseldykset da kilvat perindöllizis pruazniekois. Pahakse mielekse, kižakul’tuuru vähitellen häviey linnoin da kylien pihoilpäi. Tämän perindön säilyttämizekse da popul’arizatsiekse on luajittugi tämä kilbu, ilmoitetah kilvan luadijat saital.
Kilbua pietäh eri nominatsielois: Projektat, kuduat ollah omistettu perindöllizien rahvahallizien kižoin popul’arizatsiele, koskietah kazvattamizen, tervehyön lujoittamizen ruaduo lapsien da nuorižon kel da pohjavutah perindöllizih rahvahallizih kižoih; Metoudine kehitys perindöllizien rahvahallizien kižoin popul’arizatsiekse; Toimittajien ruado ”Ven’an rahvahan perindöllizet kižat da elostukset”; Videoruado ”Ven’an rahvahan perindöllizet kižat da elostukset”; Fotokilbu ”Ven’an rahvahan perindöllizet kižat da elostukset”; Taido — plakuattu ”Minun rahvahan perindölline kiža”, ”Internet-projektat da mobiilusoveldukset”.
Kilbah voibi jiäviekseh tuhukuun 15. päivässäh. Kilvan voittajat kučutah projektan loppupidoloih: kogo Ven’an fourumah ”Rahvahallizen kižan säilyttäjät” da tiedo-praktiellizeh konferensieh ”Kul’tuuroin vuoropagin: perindöllizet rahvahallizet kižat”, kuduat pietäh vuvvennu 2025 sulakuus Novosibirskas.
Voittajat suajah mustopalkindot da lahjat. Kai kilbah yhtynyöt suajah diplomat, parahat kilburuavot otetah kogo Ven’an kilvan loppumaterjualoih.
Ližiä tieduo voibi suaja sähköpoštači.
Aihies voit lugie vepsäkse da suomekse.
