Necen voden sügüzel linneb 15 vot, kut Aleksandra radab Karjalan Rahvahaližes teatras. Hän lopi teatraližen erišton Kul’turkolledžas, kus vaumitihe specialine akt’oroiden kurs Rahvahaližen teatran täht. Nügüd’ Aleksandral om äi rolid teatras. Hän vändab mugoižiš spektakliš, kut ”Kondi-poig”, ”Haos”, ”Kadril’” suomen da karjalan kelil.
– Teatraha penikaižen neičukaižen mindai vei tatoi. Mö kacuim Muzikaližen teatran operettoid. Siloi minä meletin: ”Nece om oza – olda scenal!” Mäni aig. Minä tegimoi aktrisaks. Nügüd’ minä sain mugoižen arvokahan nimen. Tatad ei ole. Necidä sabustust minä omištan armhale tatale, sanub hän.
Aleksandral om vepsläižid jurid. Baboi maman polespäi om Kalagespäi, a dedoi – Kakkarvespäi. Vodel 2019 tuli eloho Aleksandran uništuz: ühtes ičeze sebranikanke scenal da elos Andrei Gorškovanke hän ühtni ezmäižehe teatran istorijas ezitusehe vepsän kelel ”Kodi iknoil pöudolepäi”.