Pieneh kuvaušryhmäh kuulu kakši näyttelijyä, ohjuaja, kuvuaja, iänišuunnittelija, kuvuajan apulaini, lavaštaja ta ohjuajan assistentti.
Aleksanterin tehtahan entiseššä ruatohuonehešša olijašša kuvaušpaviljonissa on ennallissettu vanhan kylätalon neuvoštointerjeri. Kaikki esinehet ollah alkuperäset ta “elävät”.
Petroskoih tullut tunnettu urbanisti Sv’at Murunov korošti paviljonin ainutluatuisutta šekä vertasi šitä nykyaikaseh musejoh.
– Kun kuvaukšet loputah, myö haluomma, jotta šiitä tulis musejo, koroštau filmin ohjuaja Aleksei Babenko. – En taho enyä muuttua, rakentua šitä uuvveštah tahi viijä huonehkaluja pois. Missänih komeroissa ta karšinoissa ne ei kiinnoššeta ketänä. A nykyjäh täššä ne ollah kaikkien näkösällä. Jokahini voit tulla, kaččuo ta tuntie šitä outuo nostal’gijua muissellešša niistä ajoista, konša kaikilla oli šamanmoisie stolie, šuola-asteita ta piironkija.
Filmin kuvaukšen ollah oša šuurta kanšainvälistä Lokki-projektie. Šen tarkotukšena on paikallisen elokuvataijon kehityš Karjalan tašavallašša. Hau a ju -elokuva voit näyttyä alovehen mahollisukšie tällä šuunnalla.