Ainovoluadustu kieldy ruvettih opastumah Petroskois
Karjalan kielen kursiloi Petroskoil hommuau Karjalan Rahvahan Liitto. Tänävuon koronaviirusan ololois karjalan kursiloin pruazniekkuavajazii ei pietty. Karjalua ruvetah opastumah pienis joukkolois, ei enämbiä kymmendy hengie jogahizes. Kursit algajih niškoi ollah ilmazet.
Ligakuun 1. päivänny piettih enzimäine urokku livvin murdehen algajih opastujih niškoi. Livvin murdehen algukursiloi pidäy Petroskoin valdivonyliopiston opastai Anastasija Afanasjeva.
– On mieldy myo, ku kursiloile tuli äijy nuordu. Joukos ongi ruavastu rahvastu, kuduat maltetah karjalua da avvutetah nuorembale polvile kielen opastumizes, saneli Anastasija Afanasjeva.
Livvin murdehen jatkokursiloi ruvetah opastamah karjalan kielen opastai da kiändäi Tatjana Baranova da opastai Svetlana Kondratjeva. Vienan algu- da jatkokursiloi pidäy Petroskoin valdivonyliopiston loppenuh Anastasija Jungina.
Kursiloi pietäh kerran nedälis oraskuussah. Kursiloin aigua opastujile kerrotahgi karjalazien kul’tuuras da eländytavois. Paiči kieliurokkoi kačotah järjestiä matkoi karjalazih kylih.
