Aigoiden sido: Kalages avaitihe muzei Anna Lisicinan muštoks
Kalages avaitihe pert’-muzei Sovetskijan Sojuzan Gerojan Anna Mihailovan Lisicinan muštoks. Se starinoičeb Sures Kodiman voinan, Anna Lisicinan da eriližen voinoperacijan ühtnikoiden polhe.
— Nece om tärged muštazjtego ei vaiše Kalagen, Änižröunan, Karjalan i eskai Venäman täht. Nügüd’ om Vägestusen 80-vozne jubileivoz’. Se pördutoitab meid istorijaha, nenihe tragižihe aigtegoihe meiden mal. Muzejan avaiduz, Anna Lisicinan muštpachan udištamine — kaik nece sanub siš, miše meiden täht om tärged mušt istorijas, meiden ezitatoiš, neniš, ked koliba kaites meiden mad vihanikoišpäi, sanui Venäman Valdkundaližen Duman deputat Valentina Pivnenko.
Idei tehta muzei tuli Kalagen administracijan pämehele Mihail Pol’akovale ”Vepsläine”-teatrozutesen kacundan jäl’ghe. Lühüdas aigas nece idei todenzoittihe eloho sijaližiden karjeroiden pämehiden, radnikoiden da külänikoiden abul.
— Äjid eksponatoid muzejan täht andoiba Anna Lisicinan heimolaižed, külän eläjad, ”Šoutjärvelaine”-ecindjouk Viktor Loninan ohjandusel, eriližele voinoperacijale lähtnuziden saldatoiden läheližed. Mö jatktam kerata kaluid i meletan, muzei linneb melentartuine külän eläjiden da adivoiden täht, sanui Mihail Pol’akov.
Edel om völ radod. Udes kul’turkeskuses planuitas tehta vastusid, mastar’-klassoid lapsiden täht, miše kazvatada patriotizmad, armastust kodimaha, ülendust ičeze rahvahas.
Uzišt neciš temas voib lugeda mugažo suomeks.
