Vägestusen päiväl Kalagen administracii ühtes školanke da ”Pihläine”-vokal’gruppanke tegiba čoman praznikan Kalag’-, Toižeg- da Kaskez-küliden eläjiden täht. Päipaštokaz praznikpäiv toi äi ilod da hüväd mel’t kaikile tulnuzile eläjile da adivoile.
Praznikmiting zavodihe Kalages kul’turpertinno. Kalagen opendajad da openikad vaumičiba čoman programman. Kului čoma muzik, runoid, voinpajoid. Voinan aigan kolijid mušttihe änetomuden minutal, pandihe änikoid da vencoid muštpachannoks. Oli sanutud äi lämid sanoid da toivotusid veteranoile, voinan lapsile i kaikile eläjile. Jäl’ges mitingad kaikid adivoičetadihe saldatan pudrol.
Mugoine-žo praznikprogramm tehtihe susedküliden eläjiden täht.
—Tämbei om sündnu uz’ agitjouk, miččehe mülüba openikad, opendajad da vanhemb sugupol’v – ”Pihläine”-vokal’gruppan ühtnikad. Praznik, miččen hö oma tehnuded Kalages, Toižeges da Kaskezas tuli mel’he kaikile eläjile. Nece čoma tradicii pidab jatkata vodespäi vodhe, sanub Kalagen školan pämez’ Svetlana Gotič.
Praznikan tegemižehe mugažo ühtniba äjad kivisaskelmižed predprijatijad: abutiba ostta änikoid da vencoid, keitta pudrod, tehta laučan memorialanno, kirjutada voinan ühtnikoiden familijoid muštpachal. Praznik tuli lujas čoma, se ozuti, miše mušt urohoiden tegoiš kaitas kaikuččes kanzas i se anttas pol’vespäi toižhe.
Enamba kuvid voib kacta Kalagen školan gruppan Vkontakte-lehtpolel.