Abuu tulou Šuojuspäi
Karjalan mečät jatketah palua. Joga päiviä tulipalomiehien abuh tulou rahvastu Karjalan eri kohtispäi. Mečäs olles net rahvas tarvitah eri tavaroi - syömizii da ruadobrujii. Kyzyttävimii ollah viet, konservat, sormikkahat, kattilat, vuatat, bintat, labjat da muut.
Šuojun kylän eläi Anna Larionova kuhkutti omamualazii keriämäh abutavaroi kylän Vk-sivun kauti. Šuojun keskuččah Magnit-laukan tyveh rahvas tuvvah ken midä suureh vihmah kaččomattah.
- Minul on ylen žiäli meččii, niilöis eläjii elättilöi da, tiettäväine, rahvahii, kudamat jo nedälin aloh eletäh savvus da varatah tulen tulendua omah kyläh. Ga minuu kummatuttau, ku sammuttamah tulipaloloi lähtietäh rahvas, nuoret, enimät kudamis ni tietä ei, mi on tulipalo mečäs. Se on meijän tazavallan viga. Yhtelläh pidäy auttua, sanou vezibutilkan da sormikkahien tuonnuh Šuojun eläi Ol'ga.
Kai kerätyt tavarat Anna Larionova andau Karelija turističeskaja -laitoksele.
