“Üks’, kaks’, koume, ecmas sindai olen” – uz’ ozutez Rahvahaližes teatras
Sügüz’kun 12. päiväl Karjalan Rahvahaline teatr avaidab uden 92. sezonan. Kacujid varastaba uden spektakl’an ezmäine ozutez da taidehozuteluz – molembad om omištadud vepsän rahvahan kul’turale. Materialoid niiden täht oli keratud ekspedicijoiš vepsläižiden eländtahoidme.
Ekcpedicijoiden aigan ozutelusen sädai Arina Gulimova da dramaturg Liza Bulajeva keraziba todesižid starinoid da dokumentaližid tedoid vepsläižiš da heiden elos. Necen materialan pohjal Liza Bulajeva kirjuti pjesan, miččen mödhe oli tehtud spektakl’-ki.
Teatrozutez sätas surel scenal vepsän da venän kelil. Spektakl’an süžet om Nastas’a-neiččen uni, i hänele tariž “kacta” unen lophusai, mända kogonaižen matkan. Nastas’a tegeb suren haškun ičeleze vastha i hilläšti el’gendab ičtaze. Toižiden ristituiden da peitoližel satajan abul hän tedištab ičeze istorijas da kal’hudes.
– Olen ani ozakaz! Minun elon pätegendan om se, miše meiden teatras oliži vepsän kel’he, veroihe da kul’turaha sidotud ozutesid. Karjalan Rahvahaližes teatras nece om koumanz’ spektakl’, miččes starinoitas vepsläižiden polhe. Varastam teid spektakl’al! – sanui Karjalan Rahvahaližen teatran artist Aleksandra Aniskina.
Vepsläšt temad mugažo avaidab “Matk pohjoižvepsläižidennoks” -taidehozuteluz teatran ezizalas. Ozutelusen sädajad oma Karjalan Taidehmuzei da “Venäman taidehpirdajiden sebran” Karjalan regionaline filial. Ozutelusel om pandud ezile radoid, miččid karjalaižed taidehpirdajad tegiba voden 2024 kezakus ekpedicijas pohjoižvepsläižidennoks. Nece matk oli sätud Karjalan Taidehmuzejan “Joksmust vaste. Pohjoižvepsläižed” -projektan rahatugel.
Ozutelusen avaiduz linneb 12. sügüz’kud 17:00 časud. Päzund om joudai.
