80 mas kirjutadas “Vägestusen saneluz”
Sulakun 25. päiväl mäneb tradicionaline “Vägestusen saneluz” -akcii. Tedod Suren voinan istorijas kodvdas jo seičemenden kerdan. Test kirjutadas 80 mas.
— Projekt jo amu om tehnus rahvahidenkeskeižeks. Männudel vodel enamba 2 millionad ristitud kirjuti sanelust 30 tuhas sijas. Meletan, miše täl vodel melentartuz’ akcijaha ei vähene, sanui akcijan tegijoile Venäman istorialižen sebran pämez’ Sergei Nariškin.
“Vägestusen sanelusehe” mülüb pätestan kaks’ variantad, miččišpäi kaikuččes om 25 küzundad. Akcijan ühtnik voib valita miččen taht variantan. Vastusile anttas 45 minutad. Onlain-ühtnikoile küzundad ozutadas homendesel 25. sulakud.
“Vägestusen saneluses” om küzundoid erazvuiččile temoile. Ned oma voinliteraturan avtorad, fil’mad voinan polhe, lidnad-ühtnikad, voinan torad da aigtegod, generalad da tetabad saldatad, a mugažo Suren voinan muštpachad.
Sanelusehe voib ühtneda kut onlain, muga i offlain – eriližiš lidnoiden sijoiš. Sen täht pidab registriruidas akcijan internet-lehtpolel da testan kirjutamižen päivän tulda lähembaižehe sijaha, mitte om ozutadud lugetišes internet-lehtpolel. Tähäsai Karjalas om registriruidud 90 sanelusen sijad. Konz ühtnik tuleb sijaha, hän sab blank vastusiden täht da personaline nomer, miččes om 13 lugud. Nece nomer tariž kävutada möhemba, miše tedištada sanelusen satusid.
Vaumištadas “Vägestusen saneluseks” voib akcijan internet-lehtpolel, kuna om pandud erazvuiččid testoid da tegendoid.
Rahvahidenkeskeižen “Vägestusen saneluz” -akcijan aigan mugažo tehtas istorijaline online-vänd “Meiden Vägestuz”. Vänd mäneb 30. sulakud. Sihe voib ühtneda kaikutte tahtnik, kudambale om täudnu 14 vot. Ühtnendan täht tariž registriruidas internet-lehtpolel.
Uzišt neciš temas voib lugeda mugažo suomeks.
