Yllättävä miärä ihmistä tuli puromah aivopähkinöitä

Älypelin ašemien viereššä šeiso monie kymmenie ihmisie omua vuoruo vuottuas’s’a. 0+ Kuva: Uljana Tikkanen

Uhtuon karjalaisien kulttuurin pruasniekkan iltaohjelma oli esitetty taivahan alla, Runoranta-paikalla.

Paikallisien kollektiivien konsertin lisäkši oli järješšetty interaktiivini älypeli “Perintehen elävä lanka”. Šeiččemellä ašemalla oli Kalevalan eri laitokšien valmistamat tehtävät. Esimerkiksi, urheilukoulu piti ampumakilpailuo Tarkka Lemminkäini -ašemalla, Musiikkikoulu tarkašti, kuin hyvin kalevalalaiset tiijetäh opaššušlaitokšen istorijua, a Uhut-šeuran johtaja Valentina Kovalenko taričči kuvien avulla arvuamah Kalevalan ošien ta lähipaikkojen nimie.

— Tehtävie luaties’s’a monet ihmiset tiijuššettih uušie faktoja muanmiehien elämäštä ta kotipiiristä. Monet ihmiset eii tiijetty, šanakši, jotta Kalevalašša oli kakši ilmašoitinorkesterie, šanottih tehtävien kekšijät.

Pelin järještäjät koroššettih, jotta älypelih ošallistu yllättävä miärä ihmistä — 50 joukkuo. Ta jokahisešša piti olla yli kahta jäšentä, a monešša joukošša oli nellä tai viisi henkie.

— Myö ikävöičimä ilman šemmosie toimenpitoja. Pitän tauon jälkeh on mukava näketyö omamualaisien kera, šano pelin ošanottaja Galina Tabačnikova.

— Kaikešta tärkein on še, jotta Kalevalan nuoret ta vanhemmat eläjät ta vierahat voijah šeuruššella tiälä. Pruasniekašša ei myöty mitänä šyötävyä ta juotavua, vain lapšilla tarittih makieta pumpulie. Meilä onnistu luatie mukava kulttuuritapahtuma ta kiinittyä vierahien huomijuo juhlan loppuh šuaten, šano Kalevalan kulttuuritalon johtaja Ol’ga Kuraš.

Enšimmäiseštä, toisešta ta kolmannešta paikašta peluajat šuatih hyvät lahjat. Tulokšien mukah voittajakši piäsi Pionerien liikkehellä on 100 vuotta -nimini joukko.