Vieristy vinguu: kylbiekseh voibi vaigu tiettylöis kohtis
Karjalan tazavallas ollah miärätty jordanat, kudamis ruvetah kylbemäh kezoidu Vieristän aigah. Kylbiekseh pravoslavnoin pruazniekan aigah kehoitetah vaigu juuri sih niškoi valmistettulois kohtis da pellastajien silmäl olles.
Vieristän aigah, pakkaskuun 18.—19. päivien välizenny yön pravoslavnoit uskovazet perindön mugah čukeldetahes lähtieh — jordanah.
— Turvalližusehtoloin täyttämizekse kylbemizen aigah jordanoin kohtis roitah Karjalan eččo-pellastamizen palvelun ruadajat, politsiimiehet, liäkärit, tulipalomiehet, paikallizen ičehaldivon edustajat da yhteiskunnallizih liittoloih kuulujat, ilmoittau Karjalan tazavallan elospiendy- da turvalližushuollon valdivonkomitietan lehtistöpalvelu omassah tiedottehes.
Joukolleh rahvas ruvetah kylbemähes tazavallan nelläs piiris. Sordavalan piiris Valamoin suarel 18.—25. pakkaskuudu Miikulan da Pyhän Vladimiran skiitoin da Spuasan kirkastumizen manasterin tyves. Belomorskan linnas Solovetskoin kummanluadijoin Zosiman, Savvatien da Germanan kirikön tyves Saluninan uuličal 19. pakkaskuudu puoles yön algajen. Karhumäin piiris Povenčas Pyhän Miikulan kirikön pihas 12.00—15.00 čuasun aigah 19. pakkaskuudu da Kižin suarel Jamka-kyläs. Anuksen piiris Manasteris Važjärven manasterin časounalluo 19. pakkaskuudu puoles yös algajen.
Sendäh, ku ei kaikil Karjalan vezistölöil ole hyviä lujua jiädy tazavallan toizis piirilöis da alovehil virrallizii kylvendöi ei rodei.
Pellastajat nevvotah Karjalan tazavallan eläjile olla turvalližussiändölöi rikkomata.
Aihies voit lugie suomeksegi.
Yhty Oman Median kanualah Telegramas!
