Vienan virta -kanšalaisjärještöššä esitettih järještön ta Piäjärven keškikoulun välisen yhteisruavon tulokšet. Opaššušvuuvven aikana “Vienan virta” tuttavuššutti koululaisie karjalan kielen ta karjalaisien kulttuurih.
Karjalaisen kanšan perintehelliset käsityöt, puuarhitektuuri, karjalan kieli, kanšalliset ruavot ta toiset kyšymykšet oltih Vienan virta -kanšalaisjärještön pitämien tuntien teemoina.
– Meijän yhteistyö Piäjärven koulun kera alko tämän vuuvven alušta. Myö kuččuma 8. – 9. luokkien opaštajie viettämäh Miun Krjala -oppituntija Karjalaisešša pirtissä. Lapšet ta heijän luokan ohjuaja Antonina Mihailovna Zacepina mielelläh käytih meijän luokše šuamah uušie tietoja, kerto Vienan virta -kanšalaisjärještön puhienjohtaja Anna Vlasova.
Monivuotini yhteisruato jatkuu Marina Kirilinan johtaman Trollius-kerhon kera. Pirtin tiloissa opaštaja ta lapšet pietäh erilaisie tilaisukšie, tietopelija, tuttavuššutah karjalaiseh luontoh ta ekologijah, opaššutah, mitein šitä šäilyttyä.
Pienemmät lapšet niise oltih Karjalaisen pirtin vierahina. 3. luokan opaštujat ta heijän opaštaja Alevtina Drapkova käytih tiijuštamašša karjalaisista ta heijän kulttuurista.
Yhteisruato koulun kera šuunnitellah jatkua.