Lapšien folkloriyhtyvehen merkkipäiväkši oli valmissettu konserttiohjelma “Pajol ištun, pajol astun, pajol aigad mänetan”. Luovailta oli omissettu častuškoilla.
– Vielä vuotena 2005 myö kuulima Aunukšen piirin Kuujärven kyläššä kuin ämmöt šuatetah kekšie častuškoja joka tapahukšeh. Esimerkiksi, konša tervehtiy šilma, tahi konša vieraš lähtöy kotih. Kollektiivissa myö oikein tykkyämmä častuškoja. Pandemijan aikana oppituntiloilla myö kertasima niitä ta šentäh ni valiččima častuškat juhlaillan teemakši, šelitti yhtyvehen johtaja Ol’ga Gabukova.
Kaikki 20 vuotta lapšie ta opaštajie yhistäy rakkahuš Kuujärven lyydiläisien lauluperinteheh. Ol’ga Sergejevna tutkiu tätä perinnehtä ta kiinnoššuttau lapšie karjalaiseh kulttuurih.
– Lyydiläisien kulttuurie myö šanomma meijän nävökši, ka tietyšti on mukava tuttavuštuo ni toisien karjalaisien ryhmien kulttuurih. Konša yhtyveheh tultih pojat, myö ottima tutkittavakši vienankarjalaisien kulttuurie ta opaštuma pohjoistanššija. Nyt tahon opaštua lapšilla tanššilauluja, lisäsi Ol’ga Sergejevna.
Folkloriyhtyveheššä on 34 lašta. Hyö harjotellah kolmešša ryhmäššä: opaššutah laulamah, tanššimah ta šoittamah kanšallisilla šoittimilla. Lapšien opaštajina ollah Ol’ga Gabukova, Andrei Anisimov ta Polina Vorobjova.
Vesläžed-kollektiivi on monien kilpailujen voittaja ta laureatti. Šillä on myönnetty Venäjän kanšantaitehen anšijoitunut kollektiivi- šekä Karjalan esimerkillini taitoyhtyveh -arvonimet. Yhtyveh toimiu Petroskoin Balakirevilla nimitetyššä musiikkikoulušša.