“Vepsläine sarn” kerazi vepsän man sebranikoid
Kalages mäni “Vepsläine sarn” -festivalin final. Jo seičemenden kerdan “Vepsläine sarn” -festival’ kerazi vepsläižid lapsid Karjalaspäi, Piterin da Vologdan agjoišpäi. Kaiked festivalihe ühtni läz 200 mest. Täl vodel “Vepsläižel sarnal” oli kaks’ etapad. Ezmäižel etapal valitihe parahimad kollektivad, miččed voibištelihe toine toiženke finalas. Finalaha ühtni enamba 80 last. Azjtego mäni Kalagen školas.
—Festivalin finalaha ühtni enamaba 80 last Kaikuččen kerdan olen ozakaz, miše möst mö olem ühtes. Om čoma nähta tutabid armhid ristituid rindal, ühtes mö kaičem meiden vepsän kel’t, sanub školan pämez’ Svetlana Gotič.
— Mö vaumičimoiš festivalikš ani 1. süguz’kuspäi, tehnologijan urokoil omblim kost’umoid da sädim dekoracijoid, sanub vepsän kelen opendai Šoutjärven školaspäi Ales’a Anušenkova.
Lapsiden ezitusiden keskes kacujad ühtniba vepsläižehe viktorinaha. A kuni žürijouk tegi festivalin ühthevedod, Karjalan Rahvahaližen teatran arvostadud artist Aleksandra Aniskina tegi lapsiden täht mastar’-klassan, miččel starinoiči, kut oikti vaumitadas ezitushe da vedäda ičtaze scenal.
Festivalin vägestajid valitihe kahtes nominacijas: “Tradicionaline sarn” da ”Nügüd’läine sarn”. Parahimaks ”Tradicionaline sarn” -nominacijas tegihe “Kastkuine” -kollektiv Vologdan agjan Borisovo-Sudskoje -küläspäi, a “Nügüd’läine sarn” -nominacijas ezmäižen sijan sai “Vepsläižed lapsed”-kollektiv Šokšuspäi.
