Vepsläižiden kezapraznikoiden kalendar’
Tuli aig praznikoiden täht. Äjiš vepsläižiš küliš jo zavodiba vaumištadas kezapraznikoikš: kirjutada scenarijad da tehta repeticijoid. Täl vodel vepsläižed Karjalaspäi, Piterin da Vologdan agjoišpäi vaumičeba ičeze praznikoid da kucuba kaikid tahtnikoid tulda heiden külihe.
—Männudel vodel pandemijan taguiči ei olend ni-üht praznikad, ristitud tusttuiba, tahtoiba vastatas da pagišta vepsän kelel. Kaik varastaba necidä i tahtoiba, miše enamba tutabid ristitud tuliži praznikoile, sanub lehtmez’ Piterin agjaspäi P’otr Vasiljev.
Koumes Änižröunan küläs pidetas praznikad. Ezmäi Kalag’-posadas ”Kalarand”-praznik mäneb 26. kezakud. Se pidetas jo nelländel kerdal Änižen randal. Veron mödhe Šoutjärves 10.heinkud planuitas ”Elonpu”-praznik, a Šokšus 11.heinkud mäneb tradicionaline ”Pühä Päiväine”-praznik. Vologdan agjas Päžjärves linneb tehtud ”Elonpu”-praznik 17.heinkud.
Piterin agjan vepsläižed amussai pidäba vepsläižid praznikoid, külän päiväd. Täl vodel vepsläižed vasttase 13. kezakud Vidlas ”Elonpu”-praznikal. Tradicionaline praznik “Enarne Ma” planuitas Piterin agas 3-4. päivil heinkud. Ezmäi Terval-küläs, a toižel päiväl Enarv-küläs. Arskaht’- da Sodjärv’-küliš, miččed mugažo seižuba Piterin agjas linneb tehtud ”Sur’ päiv”-praznik 21.heinkud.
Vepsläižiden kezapraznikoiden kalendar’:
13. 06 – ”Elonpu” Vidlas (Piterin agj)
26.06 – ”Kalarand” Kalages (Karjala)
3.07-4.07 – “Enarne Ma” Terval- da Enarv-küliš (Piterin agj)
10.07 – ”Elonpu” Šoutjärves (Karjala)
17.07 – ”Elonpu” Päžjärves (Vologdan agj)
21.07 – ”Sur’ päiv” Arskaht’- da Sodjärv’-küliš (Piterin agj)
11.07 – ”Pühä Päiväine” Šokšus (Karjala)
