Vepsläižed kezapraznikad Änižröunas zavodihe ”Kalarandaspäi”
”Kalarand” zavodihe vepsläižes etnoparkas oficialižiš paginoišpäi, praznikan avaidusel oli Äniženröunan Administracian pämez’ Grigorii Nikolajevič Šemet, Kalagen elotahon pämehen azjoiden tegii Mihail Aleksandrovič Pol’akov da mugažo Karjalan rahvahaližen da regionaližen politikan ministerstvan pämez’ Sergei Viktorovič Kisel’ov, kudamb sanui äi kitändsanoid niile, ken sädi necen praznikan, ken kaičeb rahvahan tradicijoid da kel’t kodimal. Mugažo hän jonošti, miše valdmehed edemba-ki abutaškandeba vepsän rahvahale sen kul’turan kaičendas, no päiniciativ lähteb iče rahvahalpäi, ristituiden tahtospäi rippub vepsän kelen da kul’turan tulii aig.
”Kalarand”-praznikal ezini sijaline ”Pihläine”-ansambl’, Šoutjärven rahvahan hor, tuliba ”Čičiliušku”-, ”Karjala”- kollektivad Petroskoišpäi da Piterin agjan Majaggärven ansambl’ ”Varasta”.
- Saimoiš pit’kha tännä. Necil praznikal ezinem ezmäižel kerdal, hot’ meil om äi tutabid pohjoižvepsläižiden keskes. Meile om mel’he praznik, sanub ansambl’an ühtnik Anna Vasiljeva.
- Necil randal mäni meiden laps’aig. Siloi lapsid küläs eli äi. Kerazimoiš necile pallištole vändmaha. Kül’bimoiš Änižes. Tatanke soudim venehes. Nügüd’ tägä mäneb ”Kalarand”-praznik. Surel tahtol tuleskelen tänna, tägä eläba minun muštlotused laps’aigas, sanub praznikan adiv Nadežda Maksimova.
Om sel’ged, miše ei muite küläs mogoižen nimenke sündui kalatesele omištadud praznik. Kalatez kaiken om olnu pohjoižvepsläižiden päradon. Sikš ”Kalarandal” ei vaiše pajoiš, teatrozutelusiš da erazvuiččiš mastar’-klassoiš om ”kalatez”-tem, no przanikan päsöm-ki om lem’, miččel adivoičetadihe kaikid tahtnikoid.
