Tehtihe Ühthižvenälaižen sädaikollektivoiden konkursan ezmäižen etapan ühthevedoid ”Tradicijad”-nominacijas. Sen etapan vägestajiden keskes om Vepsän rahvahan hor.
Kaiked konkursaha ühtni 278 kollektivad: pajo-, karg-, fol’klorsebrad, rahvahiden vändimiden orkestrad. Nene sädaikollektivad ei olgoi professionaližed, no niiden ezitusiden mahtišt om lujas korged. Žürijouk kacui konkursan ühtnikoiden ezitusid da valiči 60 sädaikollektivad, miččed toižes etapas voibištelesoiš ”Kul’tura”-projektan grantan samižes. Öbokan konkursan vägestajiden lugetišes om Vepsän rahvahan hor.
— Sen täht, miše ühtneda konkursan ezmäižehe etapaha, tariž oli oigeta ezitusen video. Mö tegim videon muzejas, tägä paksumba kaiked mäneba meiden horan koncertad. Ühtnend konkursaha tob äjan ihastust. Olem ozakahad ozutada toižile, mitte bohat om meiden kul’tur. Muite pajatada ezitatoiden kelel om nügüdläižen elon sur’ oza, sanub Vepsän rahvahan horan ühtnik Natalja Anhimova.
Toine konkursan etap mäneb sulakus-semendkus Ulan-Udes, Čeboksariš, Voronežas, Astrahan’as da Petroskoiš. Petroskoiš se tehtas 27-29 sulakud. Grantoid saba konkursan 20 vägestajad.