Vepsän kelen opendai Šoutjärvespäi ezitab Karjalad Kazaniš
Nügüd’ Tatarstanan pälidnas mäneb “Parahim kodikelen da literaturan opendai-2024” -Ühthižvenälaižen konkursan final.
Konkursan finalaha ühtneb 112 opendajad Venäman 79 regionaspäi. Hö ezitaba Venäman 36 kel’t. Karjalaspäi “Parahim kodikelen da literaturan opendai-2024” -konkursan finalaha putui Šoutjärven školan vepsän kelen opendai Anastasia Jevtušenko.
— Eglai meil oliba ezmäižen kodvindad, tämbei üks’ opendajiden grupp vedi ičeze urokoid. Minä olin heiden keskes. Urok mäni hüvin. Žüri-joukule se tuli mel’he. Konkurencii om sur’: tägä om keradanus äi mahtokahid opendajid. Olen vaumiž kaikehe, no panen kaik vägid, miše voibišteldas edemba-ki, jagoi tundmusil Anastasia Jevtušenko.
Homen, konz toine opendajiden grupp mugažo vedäb ičeze urokoid, žüri-jouk valičeb 15 parahint ühtnikad. Nene opendajad ozutaba ičeze klassnijad časud pätničan. Heišpäi valitas viž mest, kudambad voibištelesoiš vägestuses kesketi sobatan.
Uzišt neciš temas voib lugeda mugažo venäks.
