Venämän päiväd Petroskoiš praznuitihe pajofestivalil
Venäman päiväl Karjalan pälidnas, Petroskoiš, mäni čoma tradicionaline pajopraznik, miččehe ühtni 80 horkollektivad Venämalpäi i Belorussiaspäi. Praznikal Karjalan valdkundad ezitiba kollektivad erazvuiččiš agjoišpäi, niiden keskes oli Vepsän rahvahan hor-ki Šoutjärvespäi.
— Praznikan idei om lujas melentartuine. Mö ühtnem neche Rahvazkeskeižehe pajofestivalihe jo ei üht vot. Kaikuččen vodenke horan ühtnikoid tegese enamba, ku männedel kerdal oli tuhad ristitud, ka tämbei om kaks’ tuhad. Necil kerdal ezmäižen kerdan ezini lapsiden hor. Se pajati tetabid lapsiden pajoid, a ühtes senke pajatiba kaik horan ühtnikad i kaik kacujad. Nece oli muštokahan tundmusen, se tuli lujas mel’he kaikile. Praznik tuli čoma, sä oli hüvä, rahvast oli lujas äi, starinoičeb Vepsän rahvahan ohjandai L’udmila Melentjeva.
Festivalin avaidusel kuluiba Venäman, a mugažo Karjalan gimnad. Programmaha mülüi 22 muziknomerad. Sen ližaks praznikan adivod voiba opetas vändmaha tradicionaližil karjalaižil vändimil i oleskelda sijaližiden mastariden jarmarkal.
