Perintehellisie lauluja ta kanšanmusiikkie kuulu Veikko Pällisellä omissetušša festivalissa. Kalevalan muan šäveltäjä, runoilija, muusikko, kuoron ta kantelistien yhtyvehen peruštaja täyttäis tänä vuotena 100 vuotta.
– Olemma oikein ilosie, jotta Veikko Pällisen 100-vuotispäivällä omissettu festivali piettih hänen kotimualla, Kalevalašša. Konsertissa esiinnyttih laulu- ta folkloriryhmät Piäjärveštä, Sohjanankošešta, Kiestinkistä, Kalevalašta šekä musikantit Jurii Žuk ta Alina Repetskaja Petroskoista, kertou Kalevalan kulttuuritalon johtaja Ol’ga Kuraš.
Veikko Pällisellä omissetun festivalin päivä perintehellisešti alko kalmismualla. Pällisen hauvalla kalevalalaiset muisseltih runoilijua. Šen jälkeh Kulttuuritalošša piettih konsertti.
Kaččojie tuli enemmän kuin tavallisešti, pitkäaikasien rajotukšien jälkeh ihmiset mielelläh käyväh kaikkih toimenpitoloih. Artistoja päinvaštoin oli vähemmän, tavallisešti festivalih tullah esiintymäh ni muusikot Šuomešta.