Vähäluguižiden rahvahiden ezitajad vastsihe Salehardas
Jamalan mal Salehard-lidnas 4.-8. päivil sulakud mäneb II Igähižiden vähäluguižiden rahvahiden forum. Se ühtenzoiti läz 300 vähäluguižiden rahvahiden ezitajad erazvuiččiš Venäman agjoišpäi. Forumaha ühtneba vepsläižed-ki delegatad: Vepsän kul’tursebran pämez’ Larisa Čirkova, Kalagen külän pämez’ Natalja Silakova Karjalaspäi da Babajevon agjan Vepsän kul’tursebran pämez’ Ol’ga Smirnova Vologdan agjaspäi.
Foruman aigan radoiba erazvuiččed sekcijad, kus päküzundad koskiba opendust, kul’turad, tradicijoiden kaičendad, norišton politikad, sportad da rahvahan elod.
— Rahvahiden ezitajad pagištihe küzundoiš, miččiš hö oma holiš nügüdlaižel aigal. Kalatuz, mectuz, kodikelen da kul’turan kaičend – naku oma tärktad küzundad, miččid letihe necil kerdal, sanub Larisa Čirkova.
Foruman aigan tehtihe Pohjoižen, Sibirin da Edahaižen Päivnouzman igähižiden vähäluguižiden rahvahiden Associacijan suim, kus oli valitud uz’ Associacijan prezident. Möst prezidentaks tegihe Grigorii Ledkov, Jamalo-Nenickijan avtonomižen ümbruzkundan ezitai.
