Vägestusen päiväle omištadud miting ühtenzoiti Kalagen, Toižegen da Kaskezan eläjid. Praznikaline azjtego zavodihe Kaskezas, kus eläjad kerazihe muštpachanno. Edel praznikad sigä pandihe völ kaks’ ližastellad, kus kirjutadihe Suren voinan ühtnikoiden nimid. Jäl’ges miting mäni Toižeges i Kalages. Neniš küliš eläjad heimolaižiden fotod käziš mäniba päirdoidme mušttes voinan aigan kollijoid.
— Kanman praznikad Suren voinan lapsile Kalagen varapämez’ Mihail Pol’akov andoi medalid, lahjoiči neilikoižid, lujas mel’he om. Sur’ spasib i kaikile toivotan kožmuselišt taivast, magukast leibäd, solaton vet, miše ei olnuiži voinad i miše kaikuččel stolal kaiken oliži leib, mittušt ei olend meil voinan aigan, sanub Kalagen eläi, Suren voinan laps’ Valentina Sem’onovna Mironova.
Jäl’ges mitingoid kaikuččes küläs adivoid i eläjid söttihe saldatan kašal i jottihe čajul pirgoidenke. Praznik lopihe Kalagen kul’turpertiš, kus külän eläjiden täht tehtihe čoma koncert. ”Pihläine”-vokal’grupp ozateli suren praznikanke kaikid tulijoid i pajati heiden täht čomid pajoid.