Uuši projekti tutkiu karjalan kielen virkehoppie
Petroskoin yliopiston filologijan instituutin Itämeren-šuomelaisen filologijan laitokšen johtajan Tatjana Paškovan kirjuttama projekti “Karjalan kielen diskursivišanat: tyyppien vertailuaspekti” voitti Venäjän tietošiätijön granttikilpailušša.
Projektin tarkotukšena on karjalan kielen virkehopin tutkimuš ta diskursivišanojen joukon, merkitykšen ta tehtävien ilmihtuomini, jotta panna ne yhteh tietoperuštah, kumpani šisältäy tietoja karjalan kielen virkehoppiyhteykšistä, šuhtehista ta yhistäjistä šanoista.
Tutkimušeh ošallistuu filologijan instituutin nellä tietomieštä: filologijan tietojen tohtori, venäjän kielen laitokšen johtaja Natalja Patrojeva, filologijan tietojen kandidatti, dosentti Aleksandr Lebedev, vanhin opaštaja aspirantti Jevgenii Karakin.
— Meijän tehtävänä on tutkie jo kerättyö ta arhiivašša šälynyttä materialie, löytyä venäjän ta itämeren-šuomelaisien kielikošetukšien erikoisukšie, kumpaset tapahuttih šamalla kulttuuri-istorijallisella tauštalla. Šiitä myö vertailemma karjalan ta venäjän kielen virkehoppirakentehie, tuomma ilmih niijen šamannäkösie piirtehie ta tutkimma missä niitä käytettih. Analisoimma karjalan kielen partikkelija ta apušanoja, ta šuatujen tietojen mukah luajimma yhtehini tietoresurssi, kerto projektin tehtävistä istorijallisien tietojen tohtori, projektin johtaja Tatjana Paškova.
Projektin aikana julkaissah tietoartikkelija ta valmissetah monografija. Tutkittavakši otetah karjalan kielen kaikki murtehet. Piätulokšena on šuuri ta monipuolini teeman tutkimini šekä šähköllisen tietoperuštan valmistamini.
— Karjalan kielen virkehoppi on hyvin vähän tutkittu teema. Še, jotta myö luajimma tietoperuštan, auttau meitä šuaha šuuremman yleisön huomijuo, noštua karjalan kielen tašuo ta šäilyttyä katojua kieltä. Projekti tulou mukavakši opaštujilla, opaštajilla, nuorilla tutkijilla ta kaikilla, ketä kiinnoštau karjalan kieli, lisäsi projektin johtaja.
Projektie ruvetah toteuttamah vuosina 2023—2024.
